Mat 10 | BJR | STEP | Yísufa narí faiqinámu qísaukuqara taikásee qíkunni óoqu qaaraqánda náaramma quqáseenoo Ánutuna afeeka nímufaqa faiqí ánaasee naunduráki máru afaannáusa faqa misá aurírana óosana óosana faqa teeroouqée marúsa faqa aiqáma áiqaraanífee qímasee afeeka níminau.

Matthew 10

Qísaukuqara taikásee qíku qaaraqánda marasée náaramámmareembinau.

(Mareekoo 3:13-19; Ruka 6:12-16)

1 Yísufa narí faiqinámu qísaukuqara taikásee qíkunni óoqu qaaraqánda náaramma quqáseenoo Ánutuna afeeka nímufaqa faiqí ánaasee naunduráki máru afaannáusa faqa misá aurírana óosana óosana faqa teeroouqée marúsa faqa aiqáma áiqaraanífee qímasee afeeka níminau. 2 Miná faiqi námu qísaukuqara taikásee qíkunni qaaraqánda óoqu marasée misá núqu maaqímmasee máriqau. Indaarú Simoona miná áuqu moó Peetooroofa faqa miná ákaqa Andurufa faqa moo fásiqa Yameesafa faqa miná ákaqa Yoohaneefa faqa miqandá níkoofa Seebeedifa márinau. 3 Moo fásiqa Firipifa faqa moo fásiqa Paatooroomaiufa faqa, moo fásiqa Toomasifa faqa moo fásiqa Mataioofa faqa mifá takísa máree marúfa faqa moo fásiqa Yameesana amaráfa mifá Arifaiusana ámaaku faqa moo fásiqa Tadiusafa faqa, moo fásiqa Simoonafa sía indaarúqaa Simoonafa miná amaráfa (mifá nári Isaraee máqannaa nári kaamánaikiaqeera qímaru fásiqafa) mifá faqa moo fásiqa Yudasifa faqa, mifá Keerioota máqusaindaraafa mifá kai Yísunara qumeé queeqáaninafa máridanoo.

Yísufa niqiqoofaqa maqúsa maqusa qímannimiqa fiqau.

(Mareekoo 6:7-13; Ruka 9:1-6)

5 Maa-namúsa qísaukuqara taikásee qíkunni óoqu qaaraqánda marasée Yísufa Isaraee máqa máaqaki minakína niqiqéenoo qímanniminau. Ánaamuru maqúsai sía fuaqa. Samaria máqusai faqa sía fuaqa. 6 Isaraee máqannaaki kai fuaqa. Misá sipsípara foora fífau faafau qiqánuasa misáki kai fuaqa. 7 Ínnee fídaqa maaqí qímasee qímannimiaqa. Innaarúnai quqúsa fannoo adeedíranoo máridanoo. 8 Miqí qímasee qímannimiseeqa misá aurírana taikánnisaaqa misá kúqirausa fíndifumánnisaaqa károora faqaasa rukánnisaaqa áfaanna naunduráki márisa áfaqannisaaqa. Sía ínnee feefaurúmmasee máraasa. Káqi máraasa. Dóo miqí kai íqa káqi nímiaqa. 9 Munnimma sía áakauqaki rúa. Káqi fúa. 10 Sía uqá tafu máree fúa. Sía qaara siuta máraaqa. Sía níku ánaamu máraaqa. Sía sáunu̱ máraaqa. Aináinira faiqiuqa aináinidaqa minakínaa nárana marasée náidaqa. Minára ínnee aináini maríafanoo minakínaana naaqa. Sía nárana ainaina máree ínnee faqa fuaqa. Káqi samu fuaqa.

11 Ínnee moo máqusai óonureeqa irámmiríaqa yáfasiqa fee amana máridanoo maasá miná faqa márianauree qiaqa. Misá qímannimifaqa mi-maqúsanaki márinna kamuqoo mi-fasiqána faqa kai máriaqa. 12 Mi-fasiqána máaqaki kéeqafinana qímamia. Ánutuna ámiqi ámiqira asooárafa ínni faqa máriani. 13 Mi-maqánakinaasa ámiqi ámiqifana aní ufa sáinanoo misá faqa máriani. Sía ámiqi ámiqifana aneenná afaaqóoqa qíra ufa óonurandee máree ánia. 14 Yámaqusanai fee yámaqannaaki fee sía ínni ufa irisée sía ínni ámiqi ámiqifaqa ínnee mi-maqusánakiqari ráudamaki fíqa kookooma afaqá qumáree nínaamarasee fuaqa. 15 Qinée mi-maqúsanaasara ánoona ufa qímannimidaqa. Numóo aukuana áninaqa ínni ufa sía írifandínna maqusanaasa Ánutufa náridanoo sía nífauaannoo firaaqóo náruannoo. Soodooma máqusa faqa Koomoora máqusa faqa misá náridanoo káqikaaqoo nífauaannoo nárirafa óoreeqánoo máriannoo.

Yísuna ufasaara nárirana faqa rumbárana faqa kambíqaani fee ufa.

(Mareekoo 13:9-13; Ruka 12:12-17)

16 Íriaqa, qinée ínni niqiqáanaqa ínnee sipsípara foora káasau faini qámbaana ínni niqiqáidaqa. Faiqí óodaa máriafanoo faiqí moómoosa ínni narusée náaqaammidammia. Minára ínnee sakáni máaso̱o aanna réeqa reendeenámasee nuaqa. Nakipurúnara foora káqi múquriqa márida, reendeenámmida máriaqa. 17 Ínnee qiní ufa máraqa nídaqa faiqíara rufíaaqa. Misá qiní ufasaara ínnikinaana akaqáusa mara máree Kansóora márinnannai múnu quqásee ínniara mandá fasiqa fee qímaseenoo kóotamannímaqéefara. Akaqáusa amaana máqaki ínniara Ánutuna ufa rukíee máriafaqee qímasee sándasamu moómoo kari ínni nifaaqa ateekéefaranoo. 18 Misá ínni akaqáusa kíapafinnai máree fifáranoo, mandáikammida ufa rukíee márifaqee únna qímasee nífiqee kíapafinnai fifáranoo, karaambáiqa márinnai kóotara ínni máree fifáranoo. Qiní dúqusaara miqífaranoo. Misá óosana oosana mandáinaina qiní ufa taikáanifeera miqímannimaqéefaranoo. Ánutufa qumeé misá faqa ánaamuru máriasa faqa qiníara íriaqeera miqímannimaqaannoo. 19 Misá ínni rumbámaree nári máriannai nífiqee fífaqa náqi fee qianáu náqi fee qianáu sía qiaqa. Mi-karí kai qiní qíkoona máraquna fannoo qímannimina ufana mi-ufána kai qímannimiaqa. 20 Nána ufa fee ínnee miqóo qifáree sía ínnindi ínni níkoona maraquna fannoo ínnikiqari ufa qíannoo.

21 Misá ínniara qinísaa atooáranara fídiaqáammífaranoo. Nári níkaqaafasaauqa kúquaqeera narí uqeeqée narí uqeeqée ifáranoo. Nári qísakoosa faqa narí uqeeqée nari uqeeqée ifáranoo. Faiqiuqáindi quandásee nári nínausa níkausa kúquaqeera uqeeqéefaranoo. 22 Qiní dúquara aiqámausa ínni fídiaqaamá nímaqaannoo. Yáfa yáfee káqi máraqa fífi̱ íqa taikára aukuana paqúrinausa, qinée mikarí misá qumára asumu máriranaki quqáanaura. 23 Misá ínni moo máqusaki nárifaqa ínnee moo máqusai sandéeqa qiníara miqóo qímannimiaqa. Qinée ánoona ufa qímannimídaqa. Ínnee Isaraee máqusa máqusa aiqáma qiníara qímannimimarifaqa sía aiqáma qímannimi taikáinnaqoo qinée faiqí nímaaku kaifáa innaarúnaindari qúmuanaura.

24 Faiqí moó fannoo sía narí uqannífiqeemaria fasiqana amana máridanoo sía miná úriqararafa máridanoo uréeqarafa máridanoo. Aináinira fasiqa faqa sía miná rakísirana úriqaránoo máridanoo uréeqánoo máridanoo. 25 Faiqí qinée úriqararausa ufa qímannimi márunausa daruséeqa miqí kaimmíqa qiní faiqi námu qiní uréeqarausa ínni nárifaranoo. Faiqí misá rakísirana arusée miná faiqi námufaqa miqí kai íqa nárifara. Misá níkoonara áfaannee qímasee faiqi námuara faqa miqí kai íqa áfaannee qifáranoo. Misá mi-manda ainainná óosana óosana qiní qímifara, miqí kai íqa ínni faqa nímifaránoo.

Sía nifaaqa árimariasara rufíaaqee ufafa.

(Ruka 12:2-7)

26 Minára sía misára rufíaaqa. Aiqáma ainaina maqee rafáaqafinoo márifa kásooqaqee Ánutufa innaarúnai aiqáma kooroo íannoo. Aiqáma kukéeqara ainaina faqa kásooqaqee Ánutufa aiqámausa nífusaa kooroo íannoo. Minára sía maqee faiqí ánaasee ínniara mandúfa qifandínnanara rufíaaqa. 27 Qinée asukunaí kukéeqafi qímannimunnana mi-ufána fáasaana paasóosamásee qímannimiaqa. Núpinúpi qímasee qímannimunnana fíndi fíqa mi-ufána fífí qímasee firaaqóo qímannimiaqa. Sía faiqíara rufíaaqa. 28 Faiqí nipata kuqá nárifandinausa sía misára rufíaaqa. Misá ínni naunduráindaraa nimana sía amana kuqá nárifaranoo. Moó fannoo Ánutufa ínni nipata faqa nimana faqa amaná idáki kuqá nárirana amanaikí marífa minára kai rufíaaqa. Faiqí nipata kái nárifandinnanara sía rufíaaqa. 29 Mandá ufini rirímma moómoo máridanoo. Káqikaa ainaina fífau ainaina máridanoo. Miná feefauru sía máridanoo. Mi-kaqikaa ufinífa sía fífaufau maqásaa áqufidanoofau, innaarúnai níkoofa írimarifanoo maqásaa áqufidanoo. 30 Ínnee sía fífau rufíaaqa. Ínni níkiaqa asausi rirímma Ánutufa nísaana rúmaqaisa máriafanoo. 31 Minára sía rufíaaqa. Ínni feefaurú úriqaránoo máridanoo. Dapi ufini feefaurú sía máridanoo.

Yísunara faiqí nífusaa kooroo ímariasara qinau.

(Ruka 12:8-9)

32 Yáfa yáfee qiní Yísusara faiqí nífusaa sía rufíeenoo qinée Yísunaindi fee qínafa qinée minára innaarúnnai qíkoona áfusaa qiníndi fee qianáura. 33 Yáfa yáfee qiníara faiqí ánaasee nífusaa asaurúsee sía qinée Yísunaindi fee qímasee kukéeqainafa qinée minára faqa innaarúnnai qíkoona áfusaa kukéeqamma amaqáanaura.

Asooárafa sía máriannoo áanóo írafa máriannoo.

(Ruka 12:51-53; 14:26-27)

34 Ínnee qiníara tínoorirana asooárana mara máree maasá maqásaa fasiqa anaasee qímiannoo fee qída fee. Qinée sía tínoorirana asooárarau qúmidau durú feefara qúmidaqa. 35 Faiqi námu nári níkoonara ámeesa úqiranara qúmidaqa. Fúka ánaaseeuqa nári nínoonara ámeesa úqiranara qúmidaqa. Fúka anaaseeuqa nári nínaakuquara nímeesa úqiranara qúmidaqa. 36 Narí faqa moodáa maqaki máriasa narí mi-fasiqána firaa namuqáa márifaranoo.

37 Yáfa yáfee miná ánoona ákoonara firaaqóo áididanoo fee qiníara óoreeqara fee qídanoo fee, mifá sía qiní qimanasaa, sía amana qiní faqa fifáranoo. Yáfa yáfee miná ámaaku faqa áraamuna faqa firaaqóo áididanoo fee qiníara óoreeqara fee, mifá faqa sía qiní qimanasaa sía amana qiní faqa fifáranoo. 38 Kásooqaqee misá aunírira saqarisaa qiní dárifaranoo. Yáfee qiní ufasaara qiní dáriranaki paasóosamándee fúaninafa, mifá qiní qimanasaa máriannoo, qiní faqa fúannoo. Faiqí ánaasee moó fannoo qinée kúquannanaki rufíasee sía fínafa, mifá sía qiní qimanasaa máriannoo sía qiní faqa fúannoo. 39 Faiqí ánaasee moó fannoo narí káqi máriranara tatamáqamándeenoo rakísi qumárainafa mi-mariráfa kai kukupámaki áqufuannoo. Faiqí ánaasee moó fannoo qiníara iriséenoo narí maqee márirana áquanínafa narí maqee márirana máraannoo.

Niqoónausara nímuqusímariana ákiaqara Ánutufa quqánnimaqaannoo.

(Mareekoo 9:41)

40 Faiqí ánaasee yáfee moó fannoo ínni dadaaqínafa mifá qiní faqa qíqoondikídanoo. Qiní dadaaqínafa qiní qíkoona qiní diqiqooná miná faqa áqoondikidanoo. 41 Faiqí ánaasee yáfee moo ámaana ufa nímimarinna fasiqanara óo Ánutuna ufa qímannimímari fee qímaseenoo dadaaqínafa Ánutufa amaana ufa nímimarina akiaqara innaarúnai feefaurú ámiannoo. Faiqí ánaasee yáfee moó fannoo andeeqára fasiqara óo andeeqára fasiqa mári fee qímasee dadaaqínafa Ánutufa minára andeeqára fasiqa miná feefaurú innaarúnai ámaqaannoo. 42 Faiqí ánaasee yáfee moó fannoo maa-faiqi anaaqísa asooára nammari néemariana níminaqa qinísaa atooéemariasa minára irisée ámiqi ámiqimmásee níminaqa, kúqaa ánoona ufa qímannimidaqa, mifá sía uqanna miná ákiaqara sía máraannoo. Ánutufa ámiannoo.